(Nov 2025)
Die genre van die enkelsnit is Afrikaans pop met ’n ligte, somer-vakansie gevoel. Dit is geskryf deur Tasha self, saam met Tasché Burger. Die titel vang die kern van die enkelsnit perfek vas, daardie gevoel van vasgevang wees in ’n verhouding of situasie waar jy nie heeltemal beheer het nie. “Ek dink almal was al op een of ander tyd in hulle lewe aan ’n lyntjie gehou,” sê Tasha. “Ek wil hê mense moet weet dis okay om daardie lyntjie te knip.”
Die inspirasie agter die enkelsnit kom uit ’n persoonlike plek. Tasha het begin skryf oor hoe dit voel om deur iemand beheer te word, en die krag wat dit neem om jouself terug te vat. Die enkelsnit dra ’n boodskap van selfrespek en bevryding, maar bly terselfdertyd lig en dansbaar. Dit is ’n liedjie vir elkeen wat al gevoel het hulle verloor hulself in ’n verhouding, en vir elkeen wat besluit het om weer hul eie storie te skryf.
Die musiekvideo vir Hou My Aan ’n Lyntjie is reeds verfilm in die Kaap. “Vir my is daar mooi in die mees pynvolle situasies,” sê sy. Die video gee ’n unieke perspektief op hoe mens groei en mooi vind, selfs in moeilike tye.
Tasha glo dat die publiek die liedjie goed gaan ontvang. Sy hoop dat mense nie net die ritme en melodie geniet nie, maar ook die dieper betekenis raaksien. “Ek wil hê mense moet dans, maar ook besef hulle mag kies om nie meer aan ’n lyntjie gehou te word nie,” sê sy. Die enkelsnit is ’n uitnodiging om weer beheer te neem oor jou eie lewe, met ’n glimlag op jou gesig. Die enkelsnit is bedoel vir almal, oud en jonk, wat al gevoel het hulle is vasgevang in ’n situasie sonder beheer.
Meer oor die kunstenaar:
Tasha is nie net besig met musiek nie, sy is ook aktief betrokke by verskeie kreatiewe projekte. Sy neem tans deel aan liedjieskryf-sessies en werk aan toekomstige vrystellings. “Ek probeer nie te lank vooruit beplan nie, want planne verander en mense verander ook,” sê sy. Haar fokus is op die hede, en om musiek te maak wat eg en betekenisvol is.
