(Mei 2025)

Johan en Zanelle Dorfling is nie bloot ’n man-en-vrou-span in huisontwerp nie – hulle is mede-pioniers op ’n roeping om ruimtes én mense se lewens te transformeer. As eienaars van Country Home & Design bring hulle veel meer as net styl en strukturele vernuwings. Hulle bring hoop. Wat hul ontwerp dryf, is nie net estetika nie, maar empatie – ’n diepe oortuiging dat elke huis ’n storie het wat gehoor moet word.

Die egpaar se storie het momentum gekry met Bou of Breek, die gewilde kykNET-reeks waarin hulle kykers se harte gewen het met hul deernisvolle benadering tot huisvernuwing.

Maar vir Johan en Zanelle maak dit die roeping nog dieper.

“Dit het begin as ’n droom ná Zanelle se eerste kennismaking met Home & Garden Television in Amerika – die gewilde Amerikaanse kanaal wat fokus op huisvernuwing en leefstyl – maar dit het ’n geloofsreis geword wat ons hele lewensrigting verander het,” verduidelik hulle.

Vandag gebruik hulle hul platform nie om roem na te jaag nie, maar om genesing en groei in ander se lewens te plant.

Hulle benadering is eenvoudig, maar kragtig: ’n mens se omgewing beïnvloed jou binneste wêreld. Daarom hanteer hulle elke projek as ‘n sielkundige én fisiese metamorfose – ‘n geleentheid om hoop te herstel waar dit dalk verlore gegaan het. Met die slagspreuk #elkehuishetsykruis herinner hulle hulself daagliks daaraan dat elke ruimte ’n kruis dra – ’n las, ’n verhaal, maar ook ’n geleentheid vir herstel.

Om hierdie pad te stap het moed geverg. Die Dorflings moes veiligheid verruil vir roeping – hul gevestigde lewens agterlaat om hul droom met oorgawe na te jaag. Maar dit is juis daardie sprong, sonder waarborge, wat hul storie so eg maak.

“Geloof vra dikwels ’n sprong – nie ’n plan nie,” sê Zanelle.

Hulle sukses lê ook in hul dinamiek. As introvert en ekstrovert, denker en voeler, bou hulle nie net huise nie, maar ’n spanbalans wat groei en kreatiwiteit laat vloei. Ja, daar is kopstamp, maar die rigting bly dieselfde: om altyd te bou – nie breek nie.

Wat hulle dryf, is groter as televisie. Dit is hul geloof, hul gesin, en hul diepe begeerte om ‘n impak te maak. Hulle glo aan werk wat sin het – projekte wat ’n nalatenskap laat.

“Die Woord van God is ons rigtingwyser,” sê Johan. “Sonder dit, verloor jy koers.”

Vir die toekoms droom hulle van projekte wat hele gemeenskappe raak – waar ontwerp ’n brug word na bemagtiging. Die les wat hulle ander wil meegee?

“Moenie wag vir toestemming nie – begin. Bou. En bou weer.”